Murashax Cabdiraxmaan Ciro Oo Maanta Ka Qeyb-Galay Aas Qaran Oo Hargeysa Looggu Sameeyey Ciyaartoy Caan Ah + Sawiro / Muuqaal

Hargeysa(Saxilnews):-Murashaxa Madaxweynaha Xisbiga mucaaradka ah ee WADDANI Dr.CabdiraxmaanM.Cabdillaahi (Cirro), ayaa maanta ka qeyb-galay aas qaran oo xabaalaha Naaso-hablood ee magaalada Hargeysa looggu sameeyey Marxuum Abiib Cabdikariin oo ka mid ahaa ciyaartoydii waaweynayd ee Somaliland, sida oo kale na ka tirsanaa Xisbiga WADDANI.

Aaskan qaran ee loo sameeyey Marxuum Abiib Cabdikariin, ayaa waxa kale oo ka soo qeyb-galay siyaasiyiin, xildhibbaano, madax-dhaqameed, mas’uuliyiin ka tirsan Xisbiga WADDANI, taliyeyaal ciidan iyo weli ba dadweyne aad u tira badan oo iskugu jira ehelada iyo qaraabada Marxuumkaasi.

 

Murashaxa Madaxweynaha WADDANI Dr.Cabdiraxmana Cirro oo ugu horeyn halkaas ka hadlay, ayaa tacsi tiiraanyo leh u diray ehelkii, qaraabaddii iyo asxaabtii uu ka baxay Marxuumku, waxaana uu Alle uga baryey in uu godka u nuuriyo sida oo kale na uu naxariistiisii janatul Fardowsa ka waraabiyo.

Dr.Cabdiraxmaan Cirro, waxa kale oo uu Marxuumkaas uu ku tilmaamay in uu ahaa shakhsi aad u wanaagsan oo caan ku ahaa kubadda cagta isaga oo sheegay in uu aad ugu xasuusto wakhtiyadii uu ciyaari jiray kubadda ee wakhtiyadii Somaliya oo uu guulo badan berigaas u soo hooyey goballada waqooyi ee Somaliland.

Marxuum Abiib Cabdikariin, ayaa sida oo kale ka tirsanaa Xisbiga WADDANI, waxaana uu ka soo jeeda beelaha Gabooye ee Somaliland

Halkan Hoose Ka Daawo Muuqaalka Warkan