Jose Mourinho ayaa ku tilmaamay ciyaartoyda Tottenham kuwa caajis ah isagoo weerar culus ku qaaday ciyaartoyda kooxdiisa.
Macalinka Tottenham ayaa ka careysnaa qaab ciyaareedka ciyaartoyda ka dib guuldaradii gurigooda ku soo gaartay kulankii furitaanka xilli ciyaareedka iyadoo ay 1-0 kaga badisay Everton.
Isagoo la hadlayay Sky Sports ka dib ciyaarta, Mourinho ayaa la weydiiyay waxa ay la tahay qaab ciyaareedka kooxdiisa ee kulankii caawa, isagoo tilmaamay in qaar ka mid ah ciyaartoydiisa inay ahaayeen kuwa caajisan.
“Waxaan qabaa inaan ku dhibtoonay inaan kubada raacano, maba raacanin kubada. Cadaadiskeena aad ayuu u liitay. Wuxuu ahaa cadaadis caajis ah” ayuu yiri Mourinho.
“Marka taas laga soo tago, qeybtii hore ee ciyaarta waxaa ina soo martay waqtiyo fiican.”
Mourinho ayaa ka dib la weydiiyay inuu sharaxaad ka bixiyay caajiska uu ku tilmaamay ciyaartoydiisa, isagoo farta ku fiiqay ciyaartoy badan oo aan taam buuxda aheyn halka uu sidoo kale cadeeyay inuu dhibaato ku qabo weeraryahanadiisa.
“Waxay caajis ku ahaayeen afka hore gaar ahaan raacashada kubada. Sidaas ayaan kala jeedaa. Waxaan sidoo kale dareemi karay in ciyaartoydeyda qaar inaysan taam buuxda aheyn” ayuu yiri Mourinho.
Mourinho ayaa bixiyay Dele Alli waqtigii nasashada ciyaarta, isagoo ku tilmaamay go’aanka uu ku bedelay xiddigiisa No.10 inay ahed mid farsamo, halka uu sidoo kale dhibaato ku qabay kubad raacashada Harry Kane, Heung-min Son iyo Dele Ali, taasoo keentay in cagta lala maro labada xiddig ee khadka dhexe Pierre-Emile Hojbjerg iyo Harry Winks.
