Israa’iil oo digniin adag u dirtay kooxda Xamaas

Hogaamiyayaasha Israa’iil ayaa uga digay kooxda Xamaas in xaaladda iska horimaad ee Qaza ay sii ballaaran doonto haddii aysan joojin gantaalada iyo buufimaha ay ku jiraan walxaha qarxa ee ay xudduuda ku soo ridayaan.

Wasiirka gaashaandhiga Israa’iil Benny Gantz ayaa sheegay in kooxda Xamas ee gacanta ku haysa Qaza ” ay khasaaro daran la kulmi doonaan “.

Balse afhayeen u hadlay Xamas ayaa wacad ku maray “inaysan ka laba-labeyn doonin inay dagaal la galaan haddii Israa’iil ay soo weerarto islamarkana ay go’doominta sii socoto “.

Kooxda Xamaas ayaa waxay 12 gantaal ku rideen dhanka Israa’iil.

Diyaaradaha dagaalka ee Israa’iil ayaa dhankooda fuliyay saddex weerar oo ay Qaza ku qaadeen.

Tan iyo toddobaadkii aanu soo dhaafnay, tiro madaafiic ah iyo buufimo walxaha qarxa ay ku jiraan ayaa laga soo riday dhanka magaalada Qaza.

Israa’iil ayaa ku jawaabtay duqeyn ay sheegtay inay la bartilmaameedsatay saldhigyo ay Xamas leeyihiin.

Israa’iil ayaa sidoo kale mamnuucday in doomaha kaluumaysi ay ka sameyaan badaha islamarkana waxaa ay ogolaanayaan oo kali ah doomaha wada gargaarka bina’aadnimo iyo kuwa badeecooyiinka u sida magaalada Qaza.

Maadaama uusan shidaal jirin waxaa go’an korantidii ay isticmaali jireen shacabka magaalada Qaza.

Shacabka ku nool magaalada Qaza oo ay tiradooda dhan tahay 1.9 milyan oo qof ayaa waxay maalinkii koranta helaan 4 saacadood oo kali ah.

Tirada gantaalada laga soo riday magaalada Qaza Khamiistii iyo subaxnnimadi Jimcaha ayaa ahaa kuwii ugu badnaa oo 24 gudahood ah la soo rido tan iyo intii isku dhacyadan ay bilaabmeen.