Moqdisho (SaxilNews):- Dowladda Soomaaliya ayaa maanta ku dhawaaqday inay si ku meel gaadh ah u joojisay duulimaadyada qaadka ee ka imaan jiray dalka Kenya laga bilaabo 6-da bisha September oo maalinta berri ku beegan
Wasiirka Gaadiidka iyo duulista Hawada ee Soomaaliya Cali Axmed Jaamac Jangali ayaa u sheegay in si K ku meel gaadh ah loo joojiyo duulimaadyada qaadka ee tagi jiray Soomaaliya.
“Waxaan si ku meel gaadh ah u joojinay duulimaadyada qaadka ee imaan jiray Soomaaliya, duruufo jira awgood, laga bilaabo 6-da bisha September”ayuu yidhi Wasiir Jangali oo ka gaabsaday sababta keentay arrintan.
Mr Jangali ayaa sheegay inay dib ka soo sheegi doonaan sababaha keenay in si ku meel gaadh ah loo joojiyo duulimaadyada Qaadka ee imaan jiray Soomaaliya.
Mar la weydiiyay inay xidhiidh la leedahay joojinta Qaadka shirka Madaxeedka IGAD ayuu waxba kama jiraan ku tilmaamay, isagoo xusay in go’aankan uu saameynayo dhamaan magaalooyinka Soomaaliya, isla markaana cidii ku xadgudubta laga qaadi doono tallaabo.
Dadka siyaasada Somaliya falanqeeya ayaa waxaa ay sheegayaan in ay arintani timid markii dawlada Kenya ay dhawaan sheegtay in qaadkeeda ay u iib geyn doonto magaalada Hargeysa
