Hargeysa(Saxilnews.com)-Dalalka Masar iyo Itoobiya oo ka mid ah wadamada ugu awoodda wayn qaaradda Afrika ayaa waxaa beryihii u dambeeyey sii xoogaysanayay dagaalka dhinaca diblomaasiyadda ah ee u dhexeeya kaa soo intiisa badani uu ku qotomo masaalixda biyaha wabiga Niilka.
Hadaba Dawladda Somaliland ayaa iyaduna dagaalkaasi dibolamaasiyadeed door muhiim ah ka ciyaari karta iyadoo ay labada dawladood ee Masar iyo Itoobiya mid kastaaba gaarkiisa u danaynayo inuu xoojiyo cilaaqaadka uu Somaliland la leeyahay.
Dhowaan ayay Dawladda Itoobiya heshiis ku saabsan isticmaalka dekedda Berbera la saxeexatay Somaliland iyadoo qayb ka mid ah dekedaasi loo gaar yeelay Itoobiya. Arrintaas ayaa dareen wayn ku abuurtay Masar oo xafiiltan wayni ka dhexeeyo Itoobiya waxaanay wafti u soo dirtay Somaliland kaasoo loo macnaystay inay Masar ka hinaastay heshiiska labada dal ee jaarka ah dhexmaray.
Balse Xukuumadda Somaliland ayuu hor yaalla hal-xidhaalaha ugu wayn kaasoo ah inay garab buuxa siiso dalka ay maslaxadeed siyaasadeed iyo dhaqaaleba ka dhex aragto iyadoo caadiyan la odhan karo in Masar iyo Itoobiya aanay isku meel u taagnayn Somaliland.
