Tababare Van Gaal iyo ciyaartoydiisa Manchester United ayaa maanka ku hayay dhibaato ay u keeni karto guuldaro garoonkooda Old Trafford kaga soo gaadha Wolfsburg, waxayna ku fikirayeen inay iska jiraan wax kasta oo kooxdooda dhibaato u keeni karta.

Guuldarooyinkii isla habeen kaliya soo gaadhay kooxooha ree Manchester ee United iyo City iyo waliba guuldarooyinkii xalay soo wada gaadhay kooxaha ree London ee Chelsea iyo Arsenal ayaa su’aal galisay awooda kooxaha Ingiriiska ee Champions Leaque-ga.

Kooxda martida ahayd ee Wolfsburg ayaa ciyaarta markiiba dardar ku bilaabatay taas oo keentay inay daqiiqadii 4 aad ee bilawgii ciyaartaba hogaanka la wareegto kadib markii uu  Daniel Caligiuri udhaliyay goolkeeda furitaanka isaga oo si deg uga faa’iidaystay kubbad fiican oo uu ka helay Max Kruse, waxyana ciyaartu noqotay 1:0 ay Wolfsburg hogaanka ciyaarta kula wareegtay.

Daniel Caligiuri ayaa kubbadan ku helay xerada ganaaxa Man United isaga oo markiiba si degan kubbada ugu darbeeyay goolka Red Devils iyada oo kubbad afar daqiiqo gudahood ku booqatay shabaqa uu David De Gea ilaashanayay.Man United ayaan ciyaarta ku bilaabay sidii laga filayay.

Daqiiqadii 33 aad ayaa Man United lagu abaal mariyay rekoodhe kadib markii uu xidigii goolka udhaliyay Wolfsburg ee  Caligiur uu kubbada gacan ku taabtay isaga oo xerada ganaaxa kooxdiisa ku jira, waxaana kubda qaatay oo rekoodhahan gool u sarifay Juan Mata oo rajayada Man United soo celiyay.Ciyaarta ayaa noqtay barbaro 1:1 ah.

Markii ay Man United la timid goolka barbaraha ayay bilawday inay qaab ciyaareedkeeda wax ka basho laakiin labadan kooxood ayaan awoodin inay qaybta hore ee ciyaarta wax goolal kale ah iska dhaliyaan, waxaana qaybta hore ee ciyaarta lagu kala nastay barbaro 1:1 ah.Markii layskugu soo laabtay qaybtii danbe ee ciyaarta ayay Man United soo laabtay iyada oo dhaarsan isla markaana uu Van Gaal dardaarankii ugu danbeeyay soo siiyay ciyaartoyda kooxdiisa.

Man United ayaa markiiba fursado bilawday waxayna dadaal dheer kadib heshay goolka ay markeeda hogaanka kula wareegtay, waxaana 53 aad goolkan udhaliyay Chris Smalling oo ofside-ka jabiyay isla markaana ka faa’iidaystay kubbad uu cidhib fiican ugu sii dhiibtay Jaun Mata, wuxuuna ciyaarta ka dhigay 2:1 ay Red Devils markeeda hogaanka ciyaarta ku qabtay.Manchester United ayaa markan dib uheshay kalsooni buuxda waxayna bilawday inay ciyaarta gacanta ku qabato laakiin Wolfsburg ayaa daqiiqadii 55 aad heshay fursad gool loo fishay kadib markii uu Caligiuri darbo halis ah ku tuuray goolka Man United laakiin markan De Gea ayaa kooxdiisa badbaadiyay isla markaana kubbada iska saaray.Wolfsburg ayaa bilawday inay ciyaarta dib ugu soo laabto isla markaana ay hurdada ka kacdo iyada oo Andre Schürrle oo ciyaarta badal ku soo galay uu isbadal wayn sameeyay. daqiiqadii 71 aad ku sigtay inuu dhaliyo goolka barbaraha isaga oo inta uu Blind uu kala jeedyay darbo gaaban ku tuuray goolka Man United laakiin kubbada ayaa birta goolka wax yar u martay.

Manchester United ayaa bilawday inay difaacaato goolka ay hogaanka ku haysay balse culayska ay Wolfsburg saartay ayaa cabsi badan lahaa. Jamaahiirta Man United ayaa wadnaha farta ugu hayay in kooxdooda lala barbareeyay maadaama oo ay Wolfsburg difaaca ku soo ururisay Man United.

Laakiin Man United ayaa marka ay kubbada hesho bilawday inay weerar deg deg ah ku qaado goolka Wolfsburg, laakiin ugu danbayn ciyaarta ayaa ku dhamaatay 2:1 ay Man United ku gaadhay guul dahabi ah.Guushan ayaa ahayd guushii ugu horaysay ee ay Man United xili ciyaareedkan ka gaadho Champions Leaque-ga.