Taliyaha ciidamada Booliska Soomaaliyeed, Cabdi Xasan Maxamed (Xijaar) ayaa maanta faahfaahin dheeraad ah ka bixiyey weerarkii saacadaha badan qaatay ee lagu qaaday Hoteelka Xayaat ee magaalada Muqdisho.
Taliye Xijaar ayaa waxaa uu sidoo kale sheegay in Ciidanka dowladda ay weerarka kasoo badbaadiyeen dad gaaraya 106 ruux , xilligii uu weerarka bilaabanayay, isagoona tacsi u diray dhammaan dadkii ku dhintay qaraxyada.
“Muddadii uu howlgalka socday hay’adaha amniga waxay xooga saareen badbaadinta iyo badqabka muwaadiniintii goobta ku sugnayd waxa ayna ku guulaysteen badbaadinta dad ka badan 106 ruux oo ay ka mid yihiin carruur iyo haween.”
Ugu yaraan 20 qof ayaa ku dhintay gulufkaasi oo socday muddo 30-saacadood ah, inkastoo warbaahinta gudaha ay sheegayso in dhimashadu ay intaas ka badan karto.
Kooxda weerarka geysatay ayaa shalay oo Jimce ahayd u adeegsaday walxaha qarxa si ay gudaha ugu galaan Hotelka Xayaat ee magaalada Muqdisho ka hor inta aysan si buuxda gacanta ugu dhigin.
Kooxda islaamiga ah ee Al-Shabaab ayaa sheegatay mas’uuliyadda weerarka.
“Ciidanka ammaanku hadda waa ay soo afjareen weerarka, ragii hubaysnaana waa ay dhinteen, ma jirto wax rasaas ah oo ka dhacay dhismaha saacadihii la soo dhaafay,” ayuu sarkaal magaciisa qariyay oo la hadlay wakaaladda wararka ee AFP sheegay.
Hoteelka ayaa si xooggan u burburay ka dib markii habeenkii Jimcaha iyo Sabtidii ay ciidamada ammaanku ku duqeeyeen bambaanooyin xooggan, iyadoo muuqaallada laga soo duubay ay muujinayaan holac iyo qiiq ka baxayay saqafka sare ee hoteelka.
BBC si madax banaan uma aysan xaqiijin in weerarka la soo afjaray iyo in kale.
Sarkaal ka tirsan booliska ayaa wakaaladda wararka ee Reuters u sheegay in laba baabuur oo walxaha qarxa laga soo buuxiyay loo adeegsaday gelitaanka hoteelka fiidnimadii Jimcaha – kuwaas oo lala beegsaday afaafka hore iyo albaabka.
War qoraal ah oo ay weerarka ka dib soo soo saartay kooxda islaamiga ah ayay ku sheegtay in ay gacanta ku hayso dhismahaas oo ay sheegtay in ay “tooganayaan qof walba”.
“Ilaa hadda, waxaan xaqiijinnay 12 qof oo rayid u badan inay dhinteen,” Maxamed, oo ah sarkaal sirdoon ah oo halkaas magac kaliya sheegtay, ayaa wakaaladda wararka ee Reuters Sabtidii u sheegay.
Ciidamada amaanka ayaa ku adkaatay in ay gudaha u galaan dabaqa mudo saacado ah, sababtoo ah dableydan oo aan tiradooda la garaneyn ayaa la sheegay in ay sidoo kale bam ku burbiriyeen jaranjaradii loo mari lahaa.
Agaasimaha isbitaalka Madina magaalada Muqdisho ayaa wakaaladda wararka ee AFP u sheegay in xaruntooda lagu daweynayo ugu yaraan 40 qof oo ku dhaawacmay weerarka hotelka iyo hoobiyeeyaal kale oo lagu weeraray goobo kale oo ka tirsan caasimadda.
Ururka Al-Qaacida oo gacan saar la leh Al-Shabaab ayaa dagaal muddo soo jiitamayay kula jira dowladda Federaalka.
Kooxdan ayaa ka talisa inta badan koonfurta iyo bartamaha Soomaaliya, balse waxay awood u yeelatay inay awoodeeda ku fidiso goobaha ay ka taliso dowladda fadhigeedu yahay Muqdisho.
