Tababaraha kooxda Tottenham ee Jose Mourinho ayaa shaaca ka qaaday kooxda dookhiisa ah dhammaan kooxaha Premier League xilli ciyaareedkan ee uu ku raaxaysto qaabka ay u ciyaarto.
Jose ayaa shalay Spurs ku hoggaamiyay guul 3-0 ah oo ay ka gaadheen dhigooda Leeds United iyagoo sidaas ku tagay booska saddexaad ee miiska kala sarreynta horyaalka.
Kulankaas ayaa ahaa kaliya mid bilaw u ah mashquul dhinaca ciyaaraha ah oo ay bishan galayso Tottenham oo Semi Final-ka Carabao Cup la ciyaari doonta Brentford halka ay sidoo kale kulan FA Cup ah toddobaadka dambe leeyihiin.
Halka ay sidoo kale horyaalka ka ciyaari doonaan kulamo ay la leeyihiin Aston Villa, Sheffield United iyo Liverpool oo lagu daray kulan kale oo FA Cup ah haddiiba ay soo baxaan.
Haddaba, Mourinho oo kulankii kaddib shalay waraysi bixinaya ayaa Leeds ku amaanay inay tahay koox adag halka uu Aston Villa oo ay kulanka xiga u tagayaan ku sifeeyay mida dookhiisa ah ee uu daawashadeeda ku raaxaysto xilli ciyaareedkan.
Jose ayaa yidhi isaga oo BT Sport u warramayay “Markii aanu ciyaaraynay, dadka loo tixgeliyo dadka lixda kooxood ee sarre waxay yidhaahdeen kulamo fudud ayaa nagu soo socda laakiin anigu dabcan ma aamisani”
“Leeds waa koox adag Aston Villa-na waa kooxda dookhayga ah wakhti xaadirkan Premier League, waan ku raaxaystaa daawashadooda, waxay haystaan ciyaaryahano wanaagsan dhab ahaan waana kuwo si wanaagsan loo maamulo”
