Xiddiga reer Germany ee Mesut Ozil ayaa hoos u dhigay dalab uu ka helay kooxda reer Turkey ee Fernabhce oo usoo dhex martay xaaskiisa, taas oo ka codsatay inay dalkaas u wada guuraan, isla markaana uu u ciyaaro naadigaas.
31 jirkan khadka dhexe oo marmar kasoo dhex muuqda kooxda Arsenal, ayaa helay fursad uu kaga bixi karayo Emirates sannad ka hor inta aanu dhamaanin qandaraaska uu kula jiro Gunners, laakiin waxa uu laacibkani iska diiday inuu ka baxo London kaddib markii ay Fenerbahce caddaysay in aanay bixin karaynin mushaharka uu hadda ka qaato Arsenal.
Sida uu qoray wargeyska The Sun ee kasoo baxa UK, xaaska uu sannadkii hore guursaday Mesut Ozil ee Amine Gulse oo ku guuleysatay quruxda waddanka Turkiga, una dhalatay dalkaas uu asal ahaanta kasoo jeedo laaicbkan ayaa ahayd xoogga ugu weyn ee dabada ka riixaysay in 31 jirkani uu aqbalo dalabka Fenerbahce.
Amine Gulse ayaa ka dalbatay saygeeda inuu aqbalo qorshaha ciyaareed ee ay ula timid kooxda reer Turkey, hase yeeshee Ozil ayaa u sheegay in £350,000 Gini oo mushahar ahaan uu uga qaato Arsenal ay u diyaariyaan, haddii kale uu soo dhamaysan doono muddadaas.
Wargeysku waxa uu sheegay in Mesut uu ka door bidayo inuu tago kooxda horyaalka Turkey isaga oo kaydka u fadhiya Arsenal inta uu heshiiskiisu ka dhamaanayo.
